Dowladda uu hoggaamiyo Madaxwaynaha Jamhuuriyadda Federaalka Mudane Dr. Xasan Sheekh Maxamuud waxaa hagaya aragti cad oo ku addan hiigsiga Soomaaliya nabad ah, caddaalad ah, isla markaana barwaaqo ah. Ka dib markii uu xilka la wareegay, Madaxwaynaha Jamhuuriyaddu waxaa uu soo bandhigay qorshihiisa siyaasadeed oo ay aas-aas u yihiin saddex tiir ama istaraatiijiyadood oo waawayn kuwaas oo dalka lagu hagayo muddo-xileedkiisa. Ajandayaashaas waxay ku salaysanyihiin himilooyinka guud ee shacabka Soomaaliyeed, waxayna udub-dhexaad u yihiin siyaasadda maamul ee Madaxwaynaha.
Adkaynta nabaddu waxay udub-dhexaad u tahay aragtida siyaasadda ee Maadaxawaynaha. Dib-u-soocelinta haybadda dowladnimo ee dalka ma hanaqaadi karto haddii uusan jirin amni la isku hallayn karo, cadaalad iyo ilaalinta sarraynta sharciga.
Iyada oo la raacayo aragtida hoggaamineed ee Madaxwaynaha, Dowladdu waxay jeexday dariiqa isku-filnaashaha iyo soo-celinta sharafka qaranka iyada oo loo marayo horurmarin dhaqaale oo waarta iyo kobcinta karaanka dadkeenna.
Tiirka saddexaad ee istaraatiijiyadda siyaasadeed ee Madaxwayanaha Jamhuuriyaddu waxa uu xoogga saarayaa adkaynta midnimada qaranka iyo dib u heshiisiinta iyada oo si arrinkaas la mid ah na sare loo qaadayo kaalinta Soomaaliya ee saaxadda dibloomaasiyadeed ee gobolka iyo midda caalamka.
Safarkayaga Qaran marnaba ma noqon mid sahlan, laakiin hal’adaygga shacabka Soomaaliyeed ayaa had iyo jeer ahaa xooggeenna ugu weyn. Maanta, uma joogno in aan ku noolaanno xusuusta taariikhdeennii hore, laakiin waxaan ka shaqaynaynaa in aan qaabayno mustaqbal midnimo, cadaalad, iyo horumar. Waa masuuliyaddeenna wadareed inaan dhisno Soomaaliya aan kala qaybsanayn oo hanata nabadda, isla markaana ka faa’iideysata karaanka jiilkeeda da’yarta ah. Aan iska diidno cabsida iyo kala qaybsanaanta, si geesinnimo leh na aan horay ugu dhaqaaqno, innaga oo ku midaysan masiirkeenna wadajirka ah. Waqtiga Soomaaliya waa hadda, waxaanna si wadajir ah u dhisi doonnaa qaran nabad ah oo barwaaqo ah
